Anomal issiqda hashar va jamoaviy ishlarni o‘tkazmaslik talab etildi
Davlat mehnat inspeksiyasi jazirama davrida xodimlarni ichimlik suvi, soyali dam olish joylari va birinchi tibbiy yordam vositalari bilan ta’minlash majburiy ekanini eslatdi.
Davlat mehnat inspeksiyasi respublikada kuzatilayotgan anomal issiq ob-havo munosabati bilan barcha hokimliklarga xodimlarning hayoti va sog‘lig‘ini muhofaza qilish bo‘yicha maxsus ko‘rsatma yubordi.
Ma’lum qilinishicha, ochiq havoda yuqori harorat sharoitida uzoq vaqt ishlash issiq urishi, organizmning suvsizlanishi, yurak-qon tomir hamda asab tizimi faoliyatining buzilishi kabi og‘ir oqibatlarga olib kelishi mumkin.
O‘zbekiston Mehnat kodeksining 359-moddasi hamda amaldagi sanitariya qoidalariga muvofiq, yilning issiq davrida ochiq hududlarda havo harorati 36°C va undan yuqori bo‘lsa, bu o‘ta xavfli (ekstremal) mehnat sharoiti hisoblanadi.
Shu munosabat bilan Davlat mehnat inspeksiyasi:
-
10:00–17:00 oralig‘ida ochiq hududlarda hasharlar, ommaviy mehnat tadbirlari va boshqa jamoaviy ishlarni tashkil etmaslik;
-
zarur ishlarni imkon qadar soat 10:00 gacha yoki 17:00 dan keyin bajarish;
-
kechiktirib bo‘lmaydigan ishlarda mehnat va dam olishning maxsus rejimini joriy etish, ish vaqtini qisqartirish hamda xodimlarni ichimlik suvi, soyali dam olish joylari, shaxsiy himoya va birinchi tibbiy yordam vositalari bilan ta’minlashni talab qildi.
Shuningdek, yuqori harorat sharoitida ishlayotgan xodimlarning sog‘lig‘i ustidan doimiy nazorat o‘rnatish, ahvoli yomonlashgan taqdirda ularni darhol ishdan ozod qilish va zarur tibbiy yordam ko‘rsatish lozimligi ta’kidlandi.
Davlat mehnat inspeksiyasi mehnatni muhofaza qilish talablarini buzish hamda xodimlar hayoti va sog‘lig‘iga xavf tug‘diruvchi mehnat sharoitlarini yaratish qonunchilikka muvofiq javobgarlikka sabab bo‘lishini eslatdi.
