AQSH Eron bilan muzokaralarni davom ettirishga tayyor — Rubio
AQSH Davlat kotibi diplomatik urinishlar samara bermasa, buning oqibatlari Eron uchun og‘ir bo‘lishi mumkinligini aytdi.
AQSH Davlat kotibi Marko Rubio Vashington ma’muriyati Eron bilan yuzaga kelgan ziddiyatni diplomatik yo‘l bilan hal qilish tarafdori ekanini ma’lum qildi. Bu haqda CNN xabar berdi.
Uning aytishicha, AQSH avval ham Tehron bilan muzokaralar orqali kelishuvga erishishga uringan va bu yo‘nalishdagi sa’y-harakatlarini davom ettiradi.
“Qo‘shma Shtatlar har doim diplomatik yechimga tayyor. Biz bunga Eron bilan bir necha bor erishishga harakat qildik va bundan keyin ham harakat qilamiz. Agar muzokaralar uchun eshik ochiq bo‘lsa, biz bunga tayyormiz”, — degan Rubio.
Davlat kotibi har qanday kelishuv samimiy bo‘lishi va tomonlar uni bajarishga tayyor bo‘lishi kerakligini ta’kidlagan.
Shuningdek, Rubio diplomatik urinishlar natija bermasa, buning oqibatlari Eron uchun salbiy bo‘lishi mumkinligini bildirib, mamlakat iqtisodiyoti allaqachon jiddiy bosim ostida ekanini qayd etgan.
Bundan tashqari, AQSH Davlat kotibi Eronni Hormuz bo‘g‘ozidagi kemalarga raketa va dronlar yordamida uyushtirilgan hujumlar uchun tanqid qildi.
