Farg‘onada yangi tug‘ilgan chaqalog‘ini sotishga uringan er-xotin 5 yilga qamaldi
Ayblanuvchilarning so‘zlariga ko‘ra, bolani sotishdan tushadigan mablag‘ qarzlarni yopish va Turkiyaga ishlash uchun ketishga sarflanishi rejalashtirilgan edi.
Farg‘ona shahrida yangi tug‘ilgan chaqalog‘ini sotishga uringan er-xotinga nisbatan sud hukmi e’lon qilindi.
Jinoyat ishlari bo‘yicha Farg‘ona shahar sudida ko‘rib chiqilgan ish materiallariga ko‘ra, ayblanuvchilar 2024-yil oktabr oyida tanishib, nikohni rasmiylashtirmasdan birga yashay boshlagan. 2025-yil oktabr oyida esa ularning o‘g‘il farzandi dunyoga kelgan.
Sudda ayol chaqaloqni sotishga moliyaviy qiyinchiliklar sabab rozi bo‘lganini ma’lum qilgan. Uning so‘zlariga ko‘ra, bolani sotishdan tushadigan mablag‘ o‘zining qarzlarini, turmush o‘rtog‘ining kreditlarini yopish hamda Turkiyaga ishlash uchun borish xarajatlariga sarflanishi rejalashtirilgan.
Shuningdek, ayol dastlab bolani sotishga rozi bo‘lmaganini, biroq tanishi farzand "yaxshi sharoitda tarbiya topishi"ni aytgach, bu fikrga ko‘nganini bildirgan. Sudlanuvchining aytishicha, turmush o‘rtog‘i reja haqida faqat bitim amalga oshiriladigan kuni xabardor bo‘lgan. Shu sabab ular o‘rtasida janjal yuzaga kelgan, ammo keyinchalik erkak ham bolani sotishga yordam berishga rozi bo‘lgan. Ularning rejasiga ko‘ra, ushbu voqeadan so‘ng ajrashish ham ko‘zda tutilgan.
Sud hukmiga ko‘ra, har ikki sudlanuvchi Jinoyat kodeksining 135-moddasi (odam savdosi) bilan aybdor deb topilib, 5 yil muddatga ozodlikdan mahrum etildi.
Shuningdek, sud chaqaloqning keyingi taqdirini hal etish masalasini Ijtimoiy himoya milliy agentligi hamda Qo‘qon shahri hokimligi huzuridagi Bolalarni himoya qilish bo‘limiga topshirdi.
