Jizzaxda shaxsiy foto va videolarni tarqatish bilan tahdid qilib pul talab qilgan shaxs ushlandi
U mahalladoshini shaxsiy tasvirlarini tarqatish bilan qo‘rqitib, 1,5 mln so‘m talab qilgan.
Jizzax viloyatida fuqaroning shaxsiy foto va videotasvirlarini ijtimoiy tarmoqlarda tarqatish bilan tahdid qilib, pul talab qilgan shaxs protsessual tartibda ushlandi. Bu haqda viloyat Ichki ishlar boshqarmasi ma’lum qildi.
Qayd etilishicha, “Xavfsiz va sog‘lom yurt” oyligi doirasida Paxtakor tumanida o‘tkazilgan tezkor tadbir davomida tovlamachilik jinoyatini sodir etganlikda gumon qilinayotgan shaxs qo‘lga olingan.
Dastlabki ma’lumotlarga ko‘ra, 1993-yilda tug‘ilgan G. M. 1996-yilda tug‘ilgan mahalladoshi B. YA. ning shaxsiy foto va videotasvirlarini ijtimoiy tarmoqlarda tarqatish bilan qo‘rqitib, undan 1 million 500 ming so‘m talab qilgan.
Gumonlanuvchi talab qilingan pul mablag‘ini olayotgan vaqtda ichki ishlar organlari xodimlari tomonidan ushlandi.
Hozirda mazkur holat yuzasidan tergov harakatlari olib borilmoqda.
