Messi va Ronaldu bilan bir oyga o‘rin almashishni istardim — Tramp
AQSH prezidenti futbol afsonalari Messi va Ronalduning hayoti o‘zinikidan ancha oson ekanini ta’kidladi.
AQSH prezidenti Donald Tramp Argentina terma jamoasi sardori Lionel Messi hamda Portugaliya terma jamoasi hujumchisi Krishtianu Ronaldu haqida iliq fikr bildirib, ular bilan qisqa muddatga o‘rin almashishni istashini aytdi.
Fox Sports nashriga bergan intervyusida Tramp har ikki futbolchini buyuk sportchilar sifatida e’tirof etib, yoshligida afsonaviy braziliyalik Pele o‘yinlarini ham tomosha qilganini eslagan.
“Messi ajoyib, Ronaldu ham ajoyib futbolchi. Men Pelening ham o‘yinini ko‘rish baxtiga muyassar bo‘lganman. Futbolda buyuk futbolchilar juda ko‘p”, — degan AQSH prezidenti.
Trampning so‘zlariga ko‘ra, u futbol olamiga oid ko‘plab ma’lumotlarni o‘g‘li Barrondan oladi, chunki u futbolning ashaddiy muxlisi hisoblanadi.
Shuningdek, AQSH prezidenti yaqinda Lionel Messi bilan uchrashgani, Krishtianu Ronalduni esa uzoq yillardan buyon tanishini ma’lum qilgan.
“Yaqinda Messi bilan uchrashdim, Krishtianuni esa anchadan beri bilaman. Ularning hayoti juda yaxshi. Ochig‘ini aytsam, ularning hayoti menikidan ancha oson. Hatto ular bilan bir oyga o‘rin almashishni ham istardim”, — dedi Tramp.
