O‘zbekistonda anomal issiq ortga chekinmoqda
Hafta o‘rtalaridan mamlakatning ko‘p qismida kunduzgi harorat 30–35 darajagacha tushishi kutilmoqda.
“O‘zgidromet” 22–25-iyul kunlari uchun ob-havo prognozini e’lon qildi. Unga ko‘ra, 23-iyuldan boshlab respublikaning aksariyat hududlarida anomal issiq asta-sekin chekina boshlaydi.
Prognozga ko‘ra, Qoraqalpog‘iston Respublikasi, Xorazm, Toshkent, Jizzax, Samarqand va Sirdaryo viloyatlarida 22–23-iyul kunlari kunduzgi havo harorati 30–35 daraja, 24–25-iyul kunlari esa 32–37 daraja atrofida bo‘ladi.
Buxoro va Navoiy viloyatlarida 22–24-iyul kunlari havo 32–37 daraja, 25-iyulda esa 34–39 daraja issiq bo‘lishi kutilmoqda.
Qashqadaryo va Surxondaryo viloyatlarida harorat eng yuqori darajada saqlanib, 22–23-iyul kunlari 34–39 daraja, 24–25-iyul kunlari esa 35–40 darajagacha ko‘tariladi. Ayrim hududlarda shamol soniyasiga 20–22 metrgacha kuchayishi va chang-to‘zon kuzatilishi mumkin.
Andijon, Namangan va Farg‘ona viloyatlarida 22-iyul kuni ayrim joylarda qisqa muddatli yomg‘ir va momaqaldiroq bo‘lishi, 23–25-iyul kunlari esa yog‘ingarchilik kutilmasligi bildirilgan.
Shuningdek, tog‘li hududlarda ayrim joylarda qisqa muddatli yomg‘ir va momaqaldiroq kuzatilishi, havo harorati kunduz kunlari 20–28 daraja atrofida bo‘lishi prognoz qilinmoqda.
