O‘zbekistonning 4 ta viloyatida sel xavfi e’lon qilindi
Kutilayotgan yomg‘irlar sabab tog‘oldi hududlarida sel-suv toshqinlari hamda ayrim joylarda suv to‘planishi ehtimoli mavjud.
“O‘zgidromet” 21–24-iyul kunlari respublikaning ayrim tog‘oldi va tog‘li hududlarida yog‘ingarchilik kuzatilishi munosabati bilan sel-suv toshqini xavfi yuzaga kelishi mumkinligi haqida ogohlantirdi.
Ma’lum qilinishicha, Toshkent, Namangan, Farg‘ona va Andijon viloyatlarining ayrim tumanlari hamda tog‘li hududlarida sel-suv toshqinlari kuzatilishi ehtimoli mavjud.
Xususan, xavf Toshkent viloyatining Ohangaron, Bo‘stonliq, Parkent, Piskent, O‘rta Chirchiq va Yuqori Chirchiq tumanlari hamda Angren va Olmaliq shaharlari, Namangan viloyatining Pop, Kosonsoy, Chortoq, Chust, Namangan va Yangiqo‘rg‘on tumanlari, Farg‘ona viloyatining So‘x, Shohimardon, Farg‘ona va Beshariq tumanlari, shuningdek Andijon viloyatining Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlari hamda Xonobod shahrini qamrab oladi.
Shuningdek, respublikaning ayrim hududlarida kuchli yomg‘irlar oqibatida yomg‘ir suvlari to‘planishi va hududlarni suv bosishi ehtimoli ham mavjud.
“O‘zgidromet” tog‘oldi va tog‘li hududlarda istiqomat qiluvchi fuqarolar, dam oluvchilar hamda ushbu yo‘nalishlarda harakatlanuvchi haydovchilardan ehtiyotkorlik choralariga qat’iy amal qilishni so‘radi.
