Rossiyaning bir necha hududiga dron hujumi uyushtirildi, sakkiz kishi halok bo‘ldi
Kiyev zarbalar harbiy logistika va dron ishlab chiqarish bilan bog‘liq obyektlarga qaratilganini bildirdi.
Rossiyaning bir necha hududiga tunda uyushtirilgan Ukraina dron hujumlari oqibatida sakkiz kishi halok bo‘ldi, 60 nafardan ortiq kishi jarohatlandi. Rossiya rasmiylari ma'lumotiga ko‘ra, hujumlar mamlakatning kamida 19 hududini qamrab olgan bo‘lib, eng katta talafot Tambov viloyatida qayd etilgan.
Tambov viloyatining Kotovsk shahrida Rossiyaning yirik internet-savdo kompaniyasi Wildberries omboriga dron zarbasi berilgan. Oqibatda tungi smenada ishlayotgan yetti nafar xodim halok bo‘ldi, yana 25 kishi jarohat olgan. Moskva viloyatining Elektrostal shahridagi yana bir Wildberries logistika markaziga hujum natijasida esa o‘nlab odamlar tan jarohati olgan.
Shuningdek, Moskva viloyatining Noginsk shahridagi neft bazasida dron zarbasi ortidan yong‘in yuzaga kelgan. Xavfsizlik nuqtai nazaridan yaqin atrofdagi tug‘ruqxona evakuatsiya qilingan. Elektrostalda dron qoldiqlari bolalar bog‘chasi binosiga ham zarar yetkazgan.
Rossiya Mudofaa vazirligi tunda 379 ta Ukraina droni urib tushirilganini ma'lum qildi. Vazirlikka ko‘ra, dronlar Rossiyaning turli hududlari, anneksiya qilingan Qrim, shuningdek, Qora va Azov dengizlari ustida yo‘q qilingan.
Ukraina prezidenti Volodimir Zelenskiy hujumlar Rossiyaning harbiy salohiyatini ta'minlayotgan obyektlarga qaratilganini bildirgan. Uning so‘zlariga ko‘ra, zarba berilgan logistika markazlarida dronlar ishlab chiqarishda qo‘llaniladigan butlovchi qismlar va navigatsiya uskunalari saqlangan. Ukraina Qurolli kuchlari, shuningdek, Rossiyaning yoqilg‘i infratuzilmasi, Qora va Azov dengizlaridagi harbiy logistika obyektlari hamda bosib olingan Lugansk viloyatidagi muhim temiryo‘l ko‘prigiga ham zarbalar berilganini ma'lum qildi.
