Saudiya Arabistoni bir yillik ko‘p martalik Umra vizasini joriy etdi
Viza egalari mamlakatga bir necha bor kirib, umumiy hisobda 90 kungacha qolishi mumkin.
Saudiya Arabistoni Haj va Umra vazirligi ziyoratchilar uchun bir yillik ko‘p martalik Umra vizasini joriy etdi.
Yangi tartibga ko‘ra, mazkur viza berilgan kundan boshlab 365 kun davomida amal qiladi va uning egalariga Saudiya Arabistoniga bir necha bor kirish hamda umumiy hisobda 90 kungacha mamlakatda bo‘lish imkonini beradi.
Saudiya matbuot agentligi (SPA) ma’lum qilishicha, ushbu tashabbus "Saudi Vision 2030" dasturi va Ziyoratchilar tajribasi dasturi maqsadlarini qo‘llab-quvvatlashga qaratilgan bo‘lib, ziyoratchilar uchun qulayliklarni oshirish, xizmatlar sifatini yaxshilash hamda raqamli xizmatlarni kengaytirishni nazarda tutadi.
Yangi tartibga muvofiq, har bir tashrif oldidan ziyoratchilar Nusuk platformasi orqali tasdiqlangan xizmat ko‘rsatuvchi tashkilotdan xizmat paketini xarid qilishi va Nusuk ilovasi orqali Umra ruxsatnomasini olishi shart.
Shuningdek, viza har safar mamlakatni tark etgandan so‘ng vaqtincha bekor qilinadi va keyingi tashrif uchun belgilangan talablar bajarilgach qayta faollashtiriladi.
Mazkur viza Haj mavsumida — Zulqa’da oyining birinchi kunidan Zulhijja oyining 13-kunigacha amal qilmaydi.
Vazirlikning ta’kidlashicha, yangi tizim Umra safarlarini rejalashtirishda yanada ko‘proq moslashuvchanlik yaratish hamda ziyoratchilar uchun xizmatlar samaradorligini oshirishga xizmat qiladi.
