Ukraina Qozog‘iston nefti ortilgan tankerlarga hujum qildi
Hodisa oqibatida jabrlanganlar yo‘q, neft yuklash esa vaqtincha to‘xtatildi.
Qora dengizda Qozog‘iston nefti yuklangan ASIA va NISSOS IOS nomli ikki tanker Ukraina dronlari hujumiga uchradi. Hodisa Kaspiy quvur liniyasi konsorsiumi (CPC) terminalida neft yuklash jarayonida sodir bo‘lgan.
Qozog‘iston Energetika vazirligi ma’lum qilishicha, hujum oqibatida tankerlarda yong‘in yuzaga kelgan, biroq ekipajlar uni qisqa vaqt ichida bartaraf etgan. Hodisada jabrlanganlar qayd etilmagan, port infratuzilmasiga jiddiy zarar yetmagan va neft sizib chiqishiga yo‘l qo‘yilmagan.
Vazirlik bildirishicha, hodisa oqibatlari to‘liq baholanmaguncha terminalda neft yuklash ishlari vaqtincha to‘xtatilgan.
Qozog‘iston Energetika vazirligi xalqaro energetika infratuzilmasining fuqarolik obyektlariga qilingan bunday hujumlarni mutlaqo qabul qilib bo‘lmas holat deb baholab, bu global energetika xavfsizligi va xalqaro savdo barqarorligiga tahdid solishini ta’kidlagan.
Qozog‘iston Tashqi ishlar vazirligi ham neft tashiyotgan tankerlarga 17 va 19-iyul kunlari uyushtirilgan hujumlarni keskin qoralab, ularni mamlakatning iqtisodiy manfaatlari hamda xalqaro transport-logistika zanjirlariga qarshi qaratilgan harakat sifatida baholagan.
Ma’lum qilinishicha, bu Qozog‘iston nefti ortilgan tankerlarga uyushtirilgan ilk hujum emas. Avvalroq, 18-iyul kuni Nordic Zenith tankeriga, joriy yilning 13-yanvarida esa Kaspiy quvur liniyasi konsorsiumi terminaliga yo‘l olgan yana uchta tankerga dronlar hujum qilgan edi.
