17 nafar hokimning lavozimiga loyiqligi bugunoq ko‘rib chiqiladi
Sanoat va eksport rejalari bajarilmagan hududlar tanqid qilinib, mas’ullarga qat’iy ogohlantirish berildi.
Prezident Shavkat Mirziyoyev raisligida o‘tkazilgan videoselektor yig‘ilishida joriy yilning olti oylik yakunlari bo‘yicha sanoat va eksport ko‘rsatkichlari tanqidiy tahlil qilindi.
Qayd etilishicha, birinchi chorak yakunida sanoat rejasini bajarmagan 13 nafar hamda eksport hajmini kamaytirgan 15 nafar tuman hokimiga nisbatan intizomiy choralar ko‘rilgan. Ushbu ogohlantirishlardan so‘ng ko‘plab hududlar rahbarlari tegishli xulosalar chiqarib, olti oylik prognoz ko‘rsatkichlarini ta’minlagan.
Shu bilan birga, ayrim tuman va shaharlarda sanoat o‘sish sur’atlari sezilarli darajada pasaygani qayd etildi. Jumladan, Yangiobod tumanida sanoat o‘sishi rejalashtirilgan 5,7 foiz o‘rniga atigi 1,8 foizni tashkil etgan. Shuningdek, G‘ozg‘on shahri, Muzrabot, Qiziriq va Oltiariq tumanlarida ham sanoat rivojlanishi sust kechayotgani tanqid qilindi.
Eksport yo‘nalishida ham qator hududlarda kutilgan natijalar ta’minlanmagani ta’kidlandi. Xususan, Kasbi, Denov, Toshkent tumani, Jizzax shahri, Paxtaobod, Navoiy shahri, Jomboy, Toyloq, Bandixon, Mirzacho‘l, Yozyovon va Bektemir tuman hamda shaharlarida eksport ko‘rsatkichlari bo‘yicha ishlar sust olib borilayotgani qayd etildi.
Yig‘ilishda Bosh vazirga sanoat va eksport yo‘nalishlarida sust natija ko‘rsatgan 17 nafar hokimning lavozimiga loyiqligini bugunning o‘zida ko‘rib chiqish topshirildi.
Shuningdek, to‘qqiz oy yakuniga qadar ushbu hududlarda vaziyat ijobiy tomonga o‘zgarmasa, viloyat hokimlarining iqtisodiyot bo‘yicha o‘rinbosarlariga nisbatan ham qat’iy choralar ko‘rilishi belgilandi.
