Afg‘onistondagi suv toshqinlari oqibatida 20 kishi halok bo‘ldi
Qidiruv-qutqaruv ishlari davom etayotgani sababli qurbonlar soni yana ortishi mumkinligi ma’lum qilindi.
Afg‘onistonning shimoli-sharqidagi Nuriston viloyatida yuz bergan kuchli yomg‘irlar oqibatida sodir bo‘lgan suv toshqinlari kamida 20 kishining hayotiga zomin bo‘ldi. Bu haqda mamlakatning Tabiiy ofatlarni boshqarish milliy boshqarmasi ma’lum qildi.
Dastlabki ma’lumotlarga ko‘ra, tabiiy ofat oqibatida 80 kishi jarohatlangan, 100 dan ortiq fuqaro bedarak yo‘qolgani taxmin qilinmoqda. Rasmiylar qidiruv-qutqaruv ishlari davom etayotgani sababli qurbonlar soni yana ortishi mumkinligini bildirgan.
Eng katta talafot Nuriston viloyatining Parun shahrida kuzatilgan. Pokiston bilan chegaradosh hududda qidiruv-qutqaruv operatsiyasi davom etmoqda.
Afg‘oniston Transport va fuqaro aviatsiyasi vazirligi huzuridagi Meteorologiya boshqarmasi yaqin kunlarda ham bir qator viloyatlarda kuchli yomg‘ir, momaqaldiroq va chang bo‘ronlari kuzatilishi, buning oqibatida yangi suv toshqinlari yuzaga kelishi mumkinligidan ogohlantirgan.
Rasmiylar aholini daryo bo‘ylari va suv toshqini xavfi yuqori bo‘lgan hududlardan uzoqroq turishga, favqulodda vaziyatlar bo‘yicha mas’ul idoralar ko‘rsatmalariga qat’iy amal qilishga chaqirgan.
Mutaxassislar tabiiy ofatlar sonining ortishini iqlim o‘zgarishi hamda yillar davomida o‘rmonlarning kesilishi natijasida tuproqning suvni shimish qobiliyati pasaygani bilan izohlamoqda.
