Belarusdagi O‘zbekiston elchisi lavozimidan ozod etildi
Shuningdek, Shavkat Mirziyoyev qator davlatlardagi elchilar faoliyati tanqid qildi.
Prezident Shavkat Mirziyoyev raisligida o‘tkazilgan videoselektor yig‘ilishida investitsiya loyihalari ijrosi hamda xorijdagi diplomatik vakolatxonalar faoliyati tanqidiy tahlil qilindi.
Qayd etilishicha, so‘nggi yillarda oliy darajadagi 52 ta xorijiy tashrif doirasida umumiy qiymati 213 milliard dollarlik 1 617 ta investitsiya loyihasi bo‘yicha kelishuvlarga erishilgan. Biroq ushbu loyihalarning amalga oshirilishi ustidan nazorat yetarli darajada tashkil etilmagani ko‘rsatib o‘tildi.
Shu munosabat bilan endilikda investitsiya loyihalari bo‘yicha ishlab chiqilgan “yo‘l xaritalari” Hisob palatasi va Tashqi ishlar vazirligi tomonidan yuritilishi belgilandi.
Bosh vazirga har hafta tarmoq rahbarlari, hududlar hokimlari va elchilar ishtirokida davlatlar kesimida hamda har bir loyiha bo‘yicha alohida muhokamalar o‘tkazish topshirildi.
Yig‘ilishda xorijdagi diplomatik vakolatxonalar faoliyati yuzasidan ham qator e’tirozlar bildirildi. Xususan, Belarusdagi O‘zbekiston elchisi investitsiya va tashqi savdo masalalariga loqayd yondashgani sabab lavozimidan ozod etilgani ma’lum qilindi.
Shuningdek, Fransiya, Avstriya, Ispaniya, Italiya, O‘mon, Indoneziya, Malayziya va Singapurdagi elchilarning faoliyati ham yetarli darajada natija bermayotgani qayd etildi.
Prezident Administratsiyasi rahbari Saida Mirziyoyevaga iqtisodiy diplomatiya, investitsiya va eksport yo‘nalishlari bo‘yicha diplomatik vakolatxonalar faoliyatini kompleks tahlil qilish, o‘z vazifasini samarali bajarmayotgan rahbarlarni zamonaviy fikrlaydigan va tashabbuskor yosh kadrlar bilan almashtirish yuzasidan takliflar tayyorlash vazifasi yuklatildi.
