Buxoro viloyati hokimi o‘rinbosari lavozimidan ozod etildi
Prezident soliq tushumlarini oshirish bo‘yicha sust ishlayotgan hududlar faoliyatini tanqid qildi.
Prezident Shavkat Mirziyoyev raisligida o‘tkazilgan videoselektor yig‘ilishida soliq tushumlari bo‘yicha mavjud imkoniyatlardan to‘liq foydalanilmayotgani tanqid qilindi.
Qayd etilishicha, yil boshidan buyon respublikada soliq tushumlari 27 foizga oshib, 130 trillion so‘mdan ortiqni tashkil etgan. Biroq qo‘shimcha tushumlar bo‘yicha belgilangan yillik rejaning atigi 40 foizi bajarilib, bu 12 trillion so‘m miqdorida bo‘lgan.
Yig‘ilishda viloyat hokimlarining birinchi o‘rinbosarlari korxonalar bilan soliq tushumlarini oshirish yuzasidan yetarli darajada ishlamayotgani tanqid qilindi.
Misol tariqasida, Buxoro viloyatida yillik aylanmasi 100 million so‘mdan yuqori bo‘lgan 162 ta korxona ketma-ket uch yil faoliyatini zarar bilan yakunlagani sababli bir so‘m ham foyda solig‘i to‘lamagani qayd etildi.
Shuningdek, 1,5 mingta korxona qo‘shilgan qiymat solig‘ini (QQS) to‘lamasdan, faqat QQSni chegirib kelayotgani aniqlangan.
Yo‘l qo‘yilgan kamchiliklar sababli Buxoro viloyati hokimining birinchi o‘rinbosari lavozimidan ozod etildi.
Yig‘ilishda 2026-yil 1-iyuldan boshlab 498 ta yirik soliq to‘lovchi korxonadan soliq undirish vakolati hududlarga o‘tkazilgani eslatilib, endilikda natija uchun bevosita hududlar mas’ul ekani ta’kidlandi.
Shu munosabat bilan viloyat hokimlarining birinchi o‘rinbosarlari hamda hududiy soliq organlari rahbarlariga mazkur korxonalar bilan tizimli ishlash, soliqlarning to‘liq va o‘z vaqtida undirilishini ta’minlash bo‘yicha aniq topshiriqlar berildi.
