Elektron to‘lov – 2 ming so‘m, naqd to‘lov esa 2 600 so‘m
Toshkent viloyatida jamoat transporti yo‘lkira tariflari yangilandi.
Toshkent viloyatida jamoat transportida yo‘lkira uchun yangi tariflar tasdiqlandi. Bu haqdagi qaror Xalq deputatlari Toshkent viloyati kengashi tomonidan 2026-yil 20-iyul kuni qabul qilindi.
Qarorga muvofiq, jamoat transportida elektron to‘lov tizimidan foydalanishni rag‘batlantirish maqsadida yo‘lkira tariflari qayta ko‘rib chiqildi.
Yangi tartibga ko‘ra:
-
transport yoki bank kartalari orqali elektron to‘lov amalga oshirilganda bir martalik yo‘lkira 2 000 so‘m etib belgilandi;
-
naqd pulda to‘lov uchun tarif elektron to‘lov narxidan 30 foiz yuqori — 2 600 so‘m etib tasdiqlandi;
-
bir yo‘lovchining yukini tashish xizmati uchun ham 2 600 so‘m miqdorida to‘lov undiriladi.
Shuningdek, qaror bilan soatlik, kunlik, uch oylik, olti oylik va yillik cheklanmagan tarif rejalarini joriy etish belgilandi.
Hujjatga ko‘ra, Toshkent viloyati shaharlarida brutto-shartnoma asosida faoliyat yuritayotgan barcha shahar avtobuslarida naqd pulsiz to‘lov tizimi bosqichma-bosqich to‘liq joriy etiladi.
Bundan tashqari, Angren, Bekobod, Olmaliq, Ohangaron, Nurafshon, Chirchiq va Yangiyo‘l shaharlarida infokiosklar o‘rnatilib, ular orqali transport kartalarini sotib olish va to‘ldirish imkoniyati yaratiladi.
Mazkur qaror rasman e’lon qilingan kundan boshlab kuchga kirgan.
