Isroil G‘azoda yangi xavfsizlik devorini qurmoqda

 
Sun’iy yo‘ldosh tasvirlari Isroil harbiylari G‘azo sektorida uzunligi o‘nlab kilometrga cho‘zilgan tuproq to‘sig‘ini barpo etayotganini ko‘rsatmoqda. To‘siq G‘azo hududining Isroil nazoratidagi qismi bilan Falastin aholisi yashayotgan hududlarni ajratib turadi. Hozirda Isroil G‘azo sektorining yarmidan ko‘prog‘ini nazorat qilmoqda. Bu haqda APnews xabar berdi.

 
Ma’lumotlarga ko‘ra, qurilish ishlari fevral oyida boshlangan va so‘nggi haftalarda tezlashgan. To‘siq Rafah va Xon Yunis atrofidagi hududlarni ham qamrab olgan. Isroil armiyasi inshoot xavfsizlik maqsadida, infiltratsiyaning oldini olish va kuzatuv tizimlarini joylashtirish uchun barpo etilayotganini bildirgan.

 
Falastinliklar va ayrim tahlilchilar esa ushbu to‘siq sulh doirasida belgilangan vaqtinchalik "sariq chiziq"ni amalda doimiy chegaraga aylantirishi mumkinligidan xavotirda. G‘azoning Isroil nazoratidagi hududlarida ko‘plab aholi punktlari va infratuzilma vayron qilingan, millionlab falastinliklar esa vaqtinchalik lagerlarda yashashga majbur bo‘lmoqda.

 
Sulh kelishuvi Isroil qo‘shinlarining keyinchalik G‘azodan olib chiqilishi va xalqaro kuchlar joylashtirilishini nazarda tutgan. Biroq muzokaralar sust kechayotgani va zo‘ravonliklar davom etayotgani sabab kelishuvning keyingi bosqichlari amalga oshmayapti. Shu bois to‘siq qurilishi G‘azo kelajagi borasidagi xavotirlarni yanada kuchaytirgan.