O‘zbekistonda 1,5 mingga yaqin fuqaro o‘zi bexabar ishga joylashtirilgan
Murojaatlar asosida 143 ta korxona rahbariga nisbatan ma’muriy va jinoiy choralar ko‘rildi.
2026-yilning birinchi yarmida fuqarolardan o‘zining xabarisiz ishga joylashtirilgani yuzasidan Davlat mehnat inspeksiyasiga 1 495 ta murojaat kelib tushgan. Bu haqda inspeksiya matbuot xizmati xabar berdi.
Murojaatlar o‘rganilishi natijasida amalda faoliyat yuritayotgan 143 ta korxona va tashkilot rahbariga nisbatan ma’muriy hamda jinoiy ta’sir choralari qo‘llanilgan. Shuningdek, 56 ta korxona va tashkilotga yozma ko‘rsatmalar kiritilgan.
Tekshiruvlar davomida ayrim murojaatlarda tilga olingan korxona va tashkilotlar faoliyati allaqachon tugatilgani ham aniqlangan.
Fuqarolarning mehnat huquqlarini tiklash maqsadida 2020–2025-yillar davomida Yagona milliy mehnat tizimi (YAMMT) bazasiga noqonuniy yoki xato kiritilgan ma’lumotlar o‘chirilib, aniqlangan kamchiliklar bartaraf etilgan.
