O‘zbekistonda islomiy bank ochish uchun yangi talablar belgilandi
Islom huquqi va moliya yo‘nalishidagi mutaxassislar uchun kamida 5 va 7 yillik ish tajribasi talabi joriy etildi.
Adliya vazirligi Bank faoliyatiga ruxsat berish tartibi va shartlari to‘g‘risidagi nizomga kiritilgan o‘zgartirish va qo‘shimchalarni davlat ro‘yxatidan o‘tkazdi.
Yangi tartibga muvofiq, "Banklar va bank faoliyati to‘g‘risida"gi Qonun asosida islomiy bank faoliyati litsenziya asosida amalga oshiriladi. Shuningdek, tadbirkorlik subyektlari tomonidan islomiy bank tashkil etish hamda amaldagi banklarda "islomiy darchalar" ochish uchun huquqiy asoslar yaratildi.
Belgilangan talablarga ko‘ra, islomiy bank yoki "islomiy darcha" tashkil etishda quyidagilar majburiy hisoblanadi:
-
Islomiy moliya kengashi a’zolarining Markaziy bank bilan kelishilgan bo‘lishi;
-
Markaziy bank malaka talablariga javob beradigan, islomiy bank faoliyatiga mas’ul rahbar xodimning mavjudligi;
-
Islomiy moliya standartlariga muvofiqlik siyosatining ishlab chiqilgan bo‘lishi.
Shuningdek, islomiy moliya kengashi kamida uch nafar a’zodan iborat bo‘lishi belgilandi. Ularning bir qismi islomshunoslik, qolganlari esa moliya-iqtisod, yuridik yoki islomshunoslik yo‘nalishida oliy ma’lumotga ega bo‘lishi lozim.
Islom huquqi bo‘yicha mutaxassis a’zolar kamida 5 yillik, texnik ekspert a’zolar esa bank, moliya yoki huquq sohasida kamida 7 yillik ish tajribasiga ega bo‘lishi talab etiladi.
Bundan tashqari, kamida bitta kengash a’zosi (2027-yil 1-iyuldan boshlab barcha a’zolar) AAOIFI tomonidan berilgan sertifikatlardan biriga ega bo‘lishi shart. Islom huquqi bo‘yicha mutaxassis a’zolar esa arab tilini bilishi hamda islom huquqiga oid birlamchi manbalarni tushunib, sharhlay olishi lozim.
Islomiy bank faoliyatiga mas’ul rahbar xodim ham bank yoki moliya tizimida kamida 7 yillik tajribaga, moliya-iqtisod yoki islomiy moliya yo‘nalishida oliy ma’lumotga hamda AAOIFI sertifikatiga ega bo‘lishi kerak.
Shu bilan birga, Markaziy bank bilan kelishilgan bank rahbar xodimlari lavozimiga kirishganidan so‘ng bu haqda 5 ish kuni ichida yozma ravishda xabardor qilish talabi bekor qilindi.
