Prezident banklar faoliyatini keskin tanqid qildi: Uch oyda natija bo‘lmasa, rahbar lavozimini tark etadi
Vazirlik va idoralarga byurokratiya, jarima hamda ortiqcha yig‘imlarni qisqartirish bo‘yicha bir haftalik muddat berildi.
Prezident Shavkat Mirziyoyev raisligida o‘tkazilgan videoselektor yig‘ilishida mahallalardagi banklar faoliyati, tadbirkorlikni qo‘llab-quvvatlash hamda byurokratik to‘siqlarni bartaraf etish masalalari tanqidiy muhokama qilindi.
Davlat rahbari banklarning mahallalardagi faoliyatidan mutlaqo norozi ekanini bildirib, Markaziy bankning hududiy rahbarlari hamda davlat banklari filiallari boshliqlari ishiga qat’iy e’tiroz bildirdi.
Qayd etilishicha, joriy yil viloyat va tuman banklari hamda mahalla uyushmalari uchun sinov va amaliy attestatsiya yili bo‘ladi. Kelgusi uch oy davomida natija ko‘rsatgan rahbarlar o‘z faoliyatini davom ettiradi, o‘zgarish qilmaganlar esa lavozimidan ozod etiladi.
Shuningdek, Bosh prokuratura va Hisob palatasiga har bir mahallada amalga oshirilayotgan ishlar hamda ularning amaliy natijalarini doimiy nazorat qilib borish vazifasi yuklatildi. Yig‘ilishda mahallalarda ozodalik, yashash madaniyati va hovli uylari bilan ishlash masalalari ham ko‘rib chiqilib, hovli uylarni boshqaruv kompaniyalari faoliyati bilan qamrab olish muhimligi ta’kidlandi.
Davlat rahbari odamlarning tadbirkorlik bilan shug‘ullanishi va eksport faoliyatini yo‘lga qo‘yishi uchun barcha zarur sharoitlar yaratilayotganini qayd etdi. Shu bilan birga, bugungi kunda 51 ta vazirlik va idora 322 ta yo‘nalish bo‘yicha moliyaviy jarima qo‘llash vakolatiga ega ekani, 2024–2026-yillar davomida qariyb 3 trillion so‘mlik jarima qo‘llangani ma’lum qilindi.
Prezident nazorat organlari faoliyatida yondashuvni tubdan o‘zgartirish zarurligini ta’kidlab, mas’ullar tadbirkorni jazolashdan avval unga imkoniyat yaratishi va to‘g‘ri yo‘l ko‘rsatishni o‘rganishi kerakligini qayd etdi.
Yig‘ilishda eksport qiluvchilar zimmasidagi ortiqcha xarajatlar ham tanqid qilindi. Jumladan, bir fura gilosni eksport qilishda bojxona yig‘imi, fumigatsiya, sertifikat va deklarant xizmatlari uchun 5 million so‘mgacha qo‘shimcha xarajat yuzaga kelayotgani misol sifatida keltirildi.
Shu munosabat bilan barcha vazirlar va tarmoq rahbarlariga bir hafta muddatda o‘z tizimlaridagi byurokratik tartib-taomillar, jarimalar, to‘lov va yig‘imlarni keskin qisqartirish hamda biznes muhitini yaxshilashga qaratilgan takliflarni Prezident Administratsiyasiga kiritish topshirildi.
