Qoraqalpog‘istonda kreditga olingan BYD auksionda sotildi
Qarzdor fuqaro bankdan kredit olib, uni to‘lamagan. Shundan so‘ng avtomashina xatlanib, auksionga chiqarilgan.
Fuqarolik ishlari bo‘yicha Beruniy tumanlararo sudining qaroriga asosan qarzdor K.Sh.dan “Trastbank” AB foydasiga 164,8 mln. so‘m undirish, undiruvni “BYD E2 EV” rusumli elektromobiliga qaratish belgilangan.
Ushbu sud qarori bo‘yicha chiqarilgan ijro hujjati Majburiy ijro byurosi Qoraqalpog‘iston Respublikasi Alohida muhim ijro ishlarini ijro etish bo‘limi ish yurituviga kelib tushib, bo‘lim tomonidan ijro harakatlariga kirishilgan.
Xususan, bo‘lim davlat ijrochisi tomonidan qarzdorga ushbu ijro hujjati ijrosini taʼminlash uchun 15 kunlik ixtiyoriy muddat berilib, sud qarorining ijrosini taʼminlamaslik oqibatlari tushuntirilgan.
Shunga qaramasdan, qarzdor tomonidan ijro hujjati talabi ixtiyoriy ravishda bajarilmaganligi sababli, kreditga olingan avtomashina bo‘lim davlat ijrochisi tomonidan tegishli tartibda xatlovga olinib, onlayn-auksion savdo maydonchasi orqali sotuvga chiqarib yuborilgan.
O‘tkazilgan auksion savdosida elektrokar 163,2 mln so‘mga sotilib, sotuvdan tushgan mablag‘lari “Trastbank” AB hisob raqamiga yo‘naltirilgan.
