Rejalarni bajarmagan rahbarlar xotirjam ishlashga haqli emas — Shavkat Mirziyoyev
Hudud va tarmoq rahbarlarining olti oylik faoliyati tanqidiy tahlil qilindi.
Prezident Shavkat Mirziyoyev raisligida joriy yilning birinchi yarmida erishilgan natijalar hamda yil yakuniga qadar amalga oshirilishi lozim bo‘lgan ustuvor vazifalarga bag‘ishlangan videoselektor yig‘ilishida hudud va tarmoq rahbarlarining olti oylik rejalari ijrosi tanqidiy tahlil qilinib, ayrim viloyat va tumanlarda yalpi hududiy mahsulot, qurilish hamda investitsiya ko‘rsatkichlari bo‘yicha mavjud imkoniyatlardan to‘liq foydalanilmagani qayd etildi.
Davlat rahbari bugungi murakkab global iqtisodiy sharoitda hududlarda tadbirkorlikni rivojlantirish va ijtimoiy infratuzilma loyihalarini amalga oshirish uchun qo‘shimcha mablag‘lar ajratilayotganini ta’kidladi.
Shu bilan birga, vazirlar, hokimlar va tarmoq rahbarlarining faoliyati avvalo aholining turmush darajasi va tadbirkorlar uchun yaratilayotgan qulayliklarda o‘z aksini topishi lozimligi qayd etildi. Agar amalga oshirilayotgan ishlar odamlar hayotida sezilmasa, bunday natijalar faqat statistik ko‘rsatkich bo‘lib qolishi ta’kidlandi.
Yig‘ilishda oylik, choraklik va yillik rejalarni bajarmagan birorta vazir, hokim yoki tarmoq rahbari bunday sharoitda xotirjam ishlashga haqli emasligi qat’iy ko‘rsatib o‘tildi.
