Toshkentda 1,4 mlrd so‘mlik “keshbek” mablag‘lari talon-toroj qilindi
322,4 milliard so‘mlik mahsulot yetkazib berilgani haqidagi soxta hujjatlar rasmiylashtirilgan.
Toshkent shahrida 1,4 milliard so‘m miqdoridagi budjet mablag‘larini «keshbek» to‘lovlari orqali talon-toroj qilish holati aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti ma’lum qildi.
Aniqlanishicha, «E.P.», «M.M.» va «E.S.» MChJ mas’ul shaxslari o‘zaro til biriktirib, go‘yoki 322,4 milliard so‘mlik mahsulot yetkazib berilgani haqida soxta hujjatlar rasmiylashtirgan.
Shuningdek, ular nazorat-kassa mashinalari orqali savdo amalga oshirilgani ko‘rinishini yaratib, 3 363 ta xarid cheki rasmiylashtirgan. Mazkur cheklar asosida ijtimoiy himoya reyestriga kiritilgan fuqarolar nomidan «Soliq Mobile» ilovasi orqali «keshbek» mablag‘lari olingan.
Oqibatda 1,4 milliard so‘m budjet mablag‘i noqonuniy ravishda talon-toroj qilingani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlarni qalbakilashtirish va ulardan foydalanish) bilan jinoyat ishi qo‘zg‘atilgan.
Hozirda mazkur ish bo‘yicha tergov harakatlari davom ettirilmoqda.
