Toshkentda alimentdan qarzdor ota choyxonadan topildi
Maʼlum bo‘lishicha, sirdaryolik qarzdor ota Toshkentda topilgan, aliment qarzini ish beruvchi to‘lab bergan.
Sud qaroriga muvofiq qarzdor B.O. dan voyaga yetmagan farzandining moddiy taʼminoti uchun aliment undirish haqidagi ijro hujjati bo‘yicha Majburiy ijro byurosining Sirdaryo tuman bo‘limi tomonidan ijro harakatlari olib borildi.
Qarzdor sud qarori mazmuni bilan tanishtirilgan bo‘lishiga qaramasdan, belgilangan aliment to‘lovlarini amalga oshirmagan hamda davlat ijrochisidan yashirinib yurganligi sababli unga nisbatan qidiruv eʼlon qilingan.
Qidiruv tadbirlari davomida qarzdorning Toshkent shahri Mirzo Ulug‘bek tumanida joylashgan choyxonada mehnat faoliyati olib borayotgani aniqlangan va u shu yerdan topilgan.
Mazkur choyxona rahbari xodimining 10 million so‘m miqdoridagi aliment qarzdorligini to‘lab bergan.
Shundan so‘ng aliment qarzi to‘liq qoplangani inobatga olinib, qarzdor rasman ogohlantirilgan hamda unga nisbatan eʼlon qilingan qidiruv tugatilgan.
