Toshkentda Bo‘zsuv kanalida bir kishi cho‘kib ketib, halok bo‘ldi
Marhumning jasadi cho‘kib ketganidan qariyb besh soat o‘tib topildi.
Toshkentning Yunusobod tumanidagi Yuqori Bo‘zsuv kanalida cho‘kib ketgan fuqaroning jasadi qidiruv ishlari natijasida hodisa joyidan taxminan 100 metr uzoqlikdan topildi.
Toshkent shahar Favqulodda vaziyatlar bosh boshqarmasi ma’lum qilishicha, hodisa 21-iyul kuni soat 14:07 da Yunusobod tumani, Yuqori Bo‘zsuv ko‘chasidan oqib o‘tuvchi Yuqori Bo‘zsuv kanalida sodir bo‘lgan.
Dastlabki ma’lumotlarga ko‘ra, fuqaro cho‘milish maqsadida suvga tushgan va ehtiyotsizligi oqibatida cho‘kib ketgan.
Voqea joyiga Toshkent shahar FVBB Maxsus qutqaruv otryadining g‘avvos-qutqaruvchilari hamda boshqa tegishli xizmatlar jalb etilib, suvda qidiruv ishlari olib borilgan.
Qidiruv ishlari natijasida fuqaroning jasadi soat 18:35 da cho‘kkan joyidan taxminan 100 metr uzoqlikdan topilib, tegishli xizmatlarga topshirilgan.
Toshkent shahar Favqulodda vaziyatlar bosh boshqarmasi fuqarolarni taqiqlangan hududlarda cho‘milmaslikka hamda cho‘milish qoidalariga qat’iy rioya etishga chaqirdi.
