Vositachilar AQSh va Eronga 10 kunlik sulh taklif qildi

AQSh va Eron o‘rtasidagi keskinlik fonida mintaqaviy vositachilar tomonlarga 10 kunlik sulh joriy etish bo‘yicha taklif taqdim etdi. Bu haqda Axios nashri o‘z manbalariga tayanib xabar berdi.

 

Nashr ma’lumotlariga ko‘ra, Qatar, Misr, Pokiston va boshqa mintaqaviy vositachilar Vashington hamda Tehronga 10 kun davomida harbiy harakatlarni to‘xtatishni nazarda tutuvchi tashabbus bilan chiqqan.

 

AQSh rasmiylari bildirishicha, Prezident Donald Tramp ma’muriyati mazkur taklifni o‘rganmoqda. Shu bilan birga, Vashington Isroilni diplomatik sa’y-harakatlarga zarar yetkazishi mumkin bo‘lgan harakatlardan tiyilishga chaqirgan.

 

Axios qayd etishicha, sulh amalga oshirilsa, harbiy harakatlar vaqtincha to‘xtatiladi, Hormuz bo‘g‘ozi orqali yuk tashish yo‘llari to‘liq ochiladi hamda AQSh va Eron o‘rtasida o‘zaro anglashuv bo‘yicha muzokaralarni qayta tiklash imkoniyati yuzaga keladi.

 

Hozircha tomonlarning hech biri ushbu taklifni rasman qabul qilmagan.

 

Nashrning yozishicha, vaziyat ikki xil ssenariy asosida rivojlanishi mumkin: birinchisi — tomonlar 10 kunlik sulhga erishadi, ikkinchisi esa muzokaralar muvaffaqiyatsiz yakunlansa, AQSh va Isroil tomonidan Eronga nisbatan keng ko‘lamli harbiy amaliyot boshlanishi ehtimoli saqlanib qoladi.

 

Shuningdek, Axios ma’lumotiga ko‘ra, AQSh so‘nggi kunlarda mintaqaga o‘nlab qiruvchi va yonilg‘i quyuvchi harbiy samolyotlarni joylashtirgan. Isroil manbalari esa mamlakat armiyasi ehtimoliy keskinlashuv fonida yuqori jangovar shay holatga keltirilganini bildirgan.