"Chorvoq meniki" deb plyajlarni bo'lisha olmagan jinoiy guruh ushlandi
Tezkor tadbirlar davomida jami 13 nafar gumonlanuvchi qo‘lga olinib, ularga nisbatan jinoyat ishlari qo‘zg‘atildi.
Davlat xavfsizlik xizmati va Ichki ishlar organlari hamkorligida o‘tkazilgan tezkor tadbirlar davomida aniqlanishicha, jinoiy guruhlar Chorvoqdagi plyajlarni noqonuniy nazorat qilish va ta'sir doirasini kengaytirish masalasida o‘zaro mojaroga kirishgan. Mojaro davomida birinchi guruh a'zolari ikkinchi guruh vakillarini do‘pposlab, ularga tan jarohati yetkazgan.
Mazkur holat yuzasidan birinchi guruhning to‘rt nafar a'zosi qo‘lga olinib, ularga nisbatan Jinoyat kodeksining 277-moddasi bilan jinoyat ishi qo‘zg‘atilib, qamoq ehtiyot chorasi qo‘llanilgan.
Shundan so‘ng, 16-iyul kuni ikkinchi guruh a'zolari qasos olish maqsadida birinchi guruhning qo‘lga olinmagan vakiliga kastet va beysbol bitasi bilan hujum qilib, unga og‘ir tan jarohati yetkazgan. Tezkor tadbirlar natijasida 19-iyul kuni ushbu guruhning uch nafar faol a'zosi va voqeaga aloqador yana olti nafar shaxs, jami to‘qqiz kishi ushlangan.
Tergov davomida ikkinchi jinoiy guruh vakillaridan birining Instagram ijtimoiy tarmog‘i orqali diniy ekstremistik g‘oyalarni targ‘ib qiluvchi materiallarni tarqatgani ham aniqlangan. Mazkur holat yuzasidan ham belgilangan tartibda huquqiy choralar ko‘rilmoqda. Tergov harakatlari davom etmoqda.
