Fermerlarni haqoratlagan Quva tumani hokimiga hayfsan berildi
Hokim odob-axloq qoidalariga zid xatti-harakatlari uchun intizomiy javobgarlikka tortildi.
Farg‘ona viloyatining Quva tumani hokimi Halimjon Umarov fermerlar bilan o‘tkazilgan yig‘ilishda davlat fuqarolik xizmatchisining odob-axloq qoidalariga zid xatti-harakatlari uchun intizomiy javobgarlikka tortildi.
Avvalroq ijtimoiy tarmoqlarda tuman hokimining fermerlar ishtirokidagi yig‘ilishda ularni haqorat qilgani hamda yerlarini topshirishni talab qilgani aks etgan audioyozuv keng muhokamalarga sabab bo‘lgan edi.
Korrupsiyaga qarshi kurashish agentligi mazkur holat yuzasidan qonunchilikda belgilangan tartibda xizmat tekshiruvi o‘tkazish va huquqiy baho berish bo‘yicha Farg‘ona viloyati hokimligiga taqdimnoma kiritgan.
Xizmat tekshiruvi yakunlariga ko‘ra, Quva tumani hokimi Halimjon Umarovga nisbatan "hayfsan" intizomiy jazosi qo‘llanilgan.
Agentlik davlat fuqarolik xizmatchilari tomonidan odob-axloq qoidalariga qat’iy rioya etilishini ta’minlash, davlat xizmatida yuksak kasbiy va axloqiy standartlarni qaror toptirish hamda qonunbuzarlik holatlariga nisbatan javobgarlik muqarrarligini ta’minlash borasidagi ishlar izchil davom ettirilishini ma’lum qildi.
