Ozarbayjonda o‘zbek shoiri Shuhrat Orifning kitobi taqdimot qilindi
TURKSOY festivali doirasida o‘zbek shoirining “Maktubdir umrim” kitobi kitobxonlarga taqdim etildi.
Ozarbayjonning Ag‘dam shahrida taniqli o‘zbek shoiri Shuhrat Orifning ozarbayjon tilida nashr etilgan “Maktubdir umrim” kitobi taqdimoti bo‘lib o‘tdi.
Taqdimot marosimi Xalqaro turkiy madaniyat tashkiloti (TURKSOY) tashabbusi bilan o‘tkazilgan Turkiy dunyo yosh shoirlarining II festivali doirasida Ag‘damdagi Mug‘om markazida tashkil etildi.
Unda TURKSOY bosh kotibi Sulton Rayev, Dunyo yosh turk yozuvchilari birligi raisi Intiqom Yashar, Ozarbayjon Yozuvchilar uyushmasi raisi o‘rinbosari Salim Babullao‘g‘li, Anqara Ijtimoiy fanlar universiteti rektori Muso Kozim Arijan, Turkiya Yozuvchilar uyushmasi raisi Muhammed Enes Kala, Turkmaniston Madaniyat vazirligi vakili Akmurod Rajabov hamda turkiy davlatlardan tashrif buyurgan adabiyot va madaniyat namoyandalari ishtirok etdi.
Tadbirda so‘zga chiqqanlar O‘zbekiston va Ozarbayjon o‘rtasidagi adabiy-madaniy aloqalar izchil rivojlanib borayotganini ta’kidlab, “Maktubdir umrim” kitobi nashrini ikki qardosh xalqning mushtarak ma’naviy qadriyatlarini targ‘ib etish yo‘lidagi muhim qadam sifatida baholadilar.
Qayd etilishicha, kitob Ozarbayjondagi Dunyo yosh turk yozuvchilari birligi hamda “Hududiy huquqiy va iqtisodiy ma’rifat” jamoat birlashmasi hamkorligida tayyorlangan. Loyiha turkiy xalqlarning umumiy ma’naviy merosini targ‘ib qilish, adabiy tarjimalarni rivojlantirish va madaniy hamkorlikni kengaytirishga qaratilgan.
Taqdimot davomida Shuhrat Orif ijodi haqida ma’ruzalar qilinib, kitobdan she’rlar o‘qildi. Ishtirokchilar ushbu nashr Ozarbayjon va O‘zbekiston o‘rtasidagi adabiy hamkorlikni yanada mustahkamlashiga ishonch bildirdilar.
