Prezident Toshkent–Samarqand pullik avtomagistrali qurilishiga tamal toshi qo‘ydi
Yangi avtomagistral ishga tushgach, Toshkent–Samarqand yo‘li 5 soatdan 2,5 soatgacha qisqaradi.
22-iyul kuni davlat rahbari Toshkent viloyatining O‘rta Chirchiq tumaniga tashrif buyurib, mamlakat tarixidagi ilk zamonaviy pullik avtomagistral loyihasining qurilishiga rasman start berdi.
Prezident ushbu loyiha Yangi O‘zbekistonning iqtisodiy qudrati va transport-logistika salohiyatini oshirishda muhim ahamiyat kasb etishini ta’kidladi.
Qariyb 2,2 milliard dollarlik loyiha doirasida 282 kilometr uzunlikdagi olti polosali avtomagistral quriladi. Yo‘l Toshkent, Sirdaryo, Jizzax va Samarqand viloyatlaridagi 13 ta tuman hududidan o‘tadi.
Loyiha tarkibida 92 ta ko‘prik, 28 ta yo‘l o‘tkazgich, 60 ta tunnel tipidagi o‘tish joyi, shuningdek, qishloq xo‘jaligi ehtiyojlari uchun yer osti yo‘laklari va suv o‘tkazish inshootlari barpo etiladi.
Monolit beton qoplamali avtomagistralda tekis hududlarda transport vositalari soatiga 150 kilometrgacha tezlikda harakatlanishi mumkin bo‘ladi.
Davlat rahbari ta’kidlaganidek, yangi yo‘l ishga tushgach, Toshkentdan Samarqandgacha bo‘lgan safar vaqti 5 soatdan 2,5 soatgacha qisqaradi. Magistral sutkasiga 60–80 ming transport vositasini qabul qilish quvvatiga ega bo‘ladi.
Hisob-kitoblarga ko‘ra, loyiha yuk tashish tannarxini 19–24 foizga kamaytiradi, logistika samaradorligini oshiradi va yo‘l bo‘yida logistika markazlari, sanoat korxonalari, servis hamda turizm obyektlari barpo etilishi hisobiga yangi ish o‘rinlari yaratiladi.
Loyiha xalqaro sifat, xavfsizlik va ekologik standartlar asosida amalga oshiriladi. Birinchi bosqich xitoylik hamkorlar bilan EPC modeli asosida quriladi, avtomagistralni 2030-yilda foydalanishga topshirish rejalashtirilgan.
