Qashqadaryoda kelinini o‘z joniga qasd qilish darajasiga yetkazgan qaynona 5 yilga qamaldi
Ayol doimiy ravishda kelinini haqorat qilgan, kaltaklagan va ota-onasi bilan muloqotini cheklagan.
Qashqadaryo viloyatining Chiroqchi tumanida kelinini muntazam ruhiy va jismoniy tazyiqqa duchor qilib, uni o‘z joniga qasd qilish darajasiga yetkazgan qaynona 5 yil muddatga ozodlikdan mahrum etildi.
Sud hujjatlariga ko‘ra, 47 yoshli ayol 2022-yildan 2025-yil oktyabr oyiga qadar kelinini uy yumushlarini bilmaslikni bahona qilib muntazam haqorat qilgan, bir necha bor kaltaklagan, uyidan haydab yuborgan hamda ruhiy bosim o‘tkazgan.
Aniqlanishicha, u kelinining ota-onasi bilan uchrashishini cheklagan, telefondan foydalanishiga to‘sqinlik qilgan. Ayrim holatlarda esa uni sochidan tortib ko‘chaga sudrab chiqqan, yuz va tanasining turli qismlariga urib, tan jarohati yetkazgan.
2025-yil 2-oktyabr kuni kelin uzoq vaqt davom etgan ruhiy va jismoniy tazyiqlarga chiday olmay, yashash xonadonidagi molxonada o‘z joniga qasd qilgan.
Jinoyat ishlari bo‘yicha Chiroqchi tumani sudining hukmiga ko‘ra, sudlanuvchi O‘zbekiston Respublikasi Jinoyat kodeksining 103-moddasi 2-qismi "a" bandi bilan aybdor deb topilgan. Jinoyat kodeksining 57-moddasi qo‘llanilib, unga 5 yil muddatga ozodlikdan mahrum qilish jazosi tayinlandi.
