Toshkentda tadbirkordan 360 ming dollar undirmoqchi bo‘lgan shaxs ushlandi
Gumonlanuvchi qurilish jarayoniga sun’iy to‘sqinlik qilmaslik evaziga pul talab qilgan.
Davlat xavfsizlik xizmati Toshkent shahar boshqarmasi xodimlari Ichki ishlar bosh boshqarmasi hamda Iqtisodiy jinoyatlarga qarshi kurashish departamenti bilan hamkorlikda o‘tkazgan tezkor tadbirda 1977-yilda tug‘ilgan, avval firibgarlik jinoyati uchun sudlangan shaxs tadbirkordan 30 ming AQSH dollari olayotgan vaqtida ashyoviy dalillar bilan ushlandi.
Aniqlanishicha, gumonlanuvchi tadbirkor Chilonzor tumanidagi 37 sotix yer maydonida nodavlat umumta’lim va maktabgacha ta’lim muassasalari qurishni rejalashtirayotganidan xabar topgan.
U shaxsiy manfaatini ko‘zlab, mazkur hudud aholisi va turli tashkilotlar orqali qurilish jarayoniga to‘sqinlik qilishi, shuningdek, o‘zini go‘yoki qurilish egasidek ko‘rsatib fuqarolarni “tinchlantirish” evaziga tadbirkordan 360 ming AQSH dollari talab qilgan.
Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
