Afg‘onistondagi suv toshqinlarida 40 dan ortiq kishi halok bo‘ldi
Kuchli yomg‘ir va suv toshqinlari oqibatida o‘nlab odamlar jarohatlangan, yana ko‘plab fuqarolar bedarak yo‘qolgan.
Afg‘oniston sharqida kuchli yomg‘irlar keltirib chiqargan suv toshqinlari oqibatida 40 dan ortiq kishi halok bo‘ldi. Bu haqda Birlashgan Millatlar Tashkiloti (BMT) ma’lum qildi.
Dastlabki ma’lumotlarga ko‘ra, tabiiy ofat oqibatida o‘nlab fuqarolar jarohat olgan, yana ko‘plab odamlar bedarak yo‘qolgan. Qidiruv-qutqaruv ishlari davom etmoqda.
BMT ma’lumotiga ko‘ra, suv toshqinlari turar joylar, jamoat binolari va tijorat obyektlariga jiddiy zarar yetkazgan. Hozirda yetkazilgan zarar ko‘lami aniqlanmoqda.
BMTning gumanitar agentliklari va hamkor tashkilotlari jabrlanganlarning ehtiyojlarini baholamoqda. Vaqtinchalik boshpana, oziq-ovqat, tibbiy xizmat, zarur buyumlar hamda psixologik yordam ko‘rsatish ustuvor yo‘nalish sifatida belgilangan.
Shuningdek, ofat hududlariga ko‘chma tibbiy brigadalar yuborilgan, tibbiyot muassasalari kuchaytirilgan ish rejimiga o‘tkazilgan. Biroq shikastlangan yo‘llar va tog‘li hududlar qutqaruv hamda gumanitar operatsiyalarni murakkablashtirmoqda.
