Eron hali AQSh bilan kelishuvga tayyor emas — Tramp
AQSh prezidenti Eron har safar muzokaralar vaqtida shartlarni o‘zgartirishga urinayotganini bildirib, bu jarayon tez orada yakunlanishiga ishonch bildirdi.
AQSh prezidenti Donald Tramp Eron hozircha Vashington bilan kelishuv tuzishga tayyor emasligini, biroq yaqin orada bunga tayyor bo‘lishiga ishonishini bildirdi.
Jorjiya shtatidagi Marietta shahrida tarafdorlari bilan uchrashuvda so‘zga chiqqan Trampning ta’kidlashicha, Tehron kelishuvga erishishni istaydi, biroq hozircha bunga tayyor emas.
“Ular hali kelishuvga tayyor emas. Lekin juda tez orada tayyor bo‘lishadi,” — degan AQSh prezidenti.
Trampning so‘zlariga ko‘ra, Eron muzokaralar davomida har safar kelishuv shartlarini o‘zgartirishga urinmoqda. Shu bilan birga, u Tehrondan inqirozni hal qilishga tayyorligi haqida signallar olinayotganini, biroq bu AQSh istayotgan shartlar asosida emasligini qayd etgan.
AQSh prezidenti, shuningdek, Eron bilan bog‘liq vaziyat yuzasidan:
“Biz ularga juda qattiq zarba berdik,” — deya ta’kidlagan.
Shu bilan birga, Tramp Eron bilan yuzaga kelgan vaziyatni jiddiy mojaro sifatida baholamasligini bildirib, uni “kichik to‘qnashuv” deb atagan.
