Fransiyada rekord darajadagi jazirama oqibatida 5 764 kishi vafot etdi
Mutaxassislar bunday ko‘rsatkich 2003-yildan buyon kuzatilgan eng og‘ir issiq to‘lqinlaridan biri ekanini qayd etdi.
Fransiyada iyun oyida kuzatilgan kuchli jazirama oqibatida kamida 5 764 nafar ortiqcha o‘lim holati qayd etildi. Bu haqda mamlakatning Santé publique France sog‘liqni saqlash agentligi ma’lum qildi.
Agentlik ma’lumotlariga ko‘ra, 17-iyun – 2-iyul kunlari Fransiyada 21 674 nafar fuqaro vafot etgan. Bu odatda shu davrda kuzatiladigan 15 910 ta o‘lim holatidan 5 764 taga ko‘p.
Mutaxassislarning ta’kidlashicha, bu 2003-yildan buyon qayd etilgan eng og‘ir issiq to‘lqinlaridan biri bo‘ldi. Biroq o‘sha yili yuz bergan tarixiy jazirama qariyb 15 ming kishining hayotiga zomin bo‘lgandi.
Qayd etilishicha, ortiqcha o‘lim holatlarining qariyb uchdan ikki qismi 75 yosh va undan katta fuqarolar hissasiga to‘g‘ri kelgan. Shu bilan birga, ilk bor 15 yoshdan katta barcha yosh guruhlarida ham o‘lim ko‘rsatkichining oshgani kuzatilgan.
O‘lim holatlari kasalxonalar, xonadonlar va qariyalar uylarida qayd etilgan bo‘lib, ularning qariyb yarmi shifoxonalarda sodir bo‘lgan.
Santé publique France bunday holatlar issiq to‘lqinlari boshlanishidan avval profilaktik choralarni kuchaytirish va aholining sog‘lig‘ini himoya qilish bo‘yicha tezkor choralar ko‘rish zarurligini yana bir bor ko‘rsatganini ta’kidlagan.
