Migratsiya agentligiga nisbatan ijro harakatlari to‘xtatilgani yo‘q — MIB
MIB sobiq agentlik xodimlarini ishga tiklash bo‘yicha ijro ishlari to‘xtatilgani haqidagi xabarlarni inkor etdi.
Majburiy ijro byurosi (MIB) Migratsiya agentligiga nisbatan ijro harakatlari to‘xtatilgani haqidagi xabarlarni rad etdi.
MIB ma’lum qilishicha, Olmazor tuman bo‘limi ish yurituvida tugatilgan Tashqi mehnat migratsiyasi agentligidan 126 ta ijro hujjati bo‘yicha 13,6 milliard so‘m undirish hamda 28 nafar sobiq xodimni ishga tiklash to‘g‘risidagi sud qarorlari mavjud.
Prezident farmoniga muvofiq eski agentlik tugatilib, uning huquqiy vorisi sifatida Vazirlar Mahkamasi huzuridagi Migratsiya agentligi tashkil etilgan. Shu asosda MIB qarzdorlik va ishga tiklash majburiyatini yangi agentlik zimmasiga yuklash haqida qaror chiqargan.
Biroq yangi Migratsiya agentligi ushbu qarordan norozi bo‘lib sudga murojaat qilgan. Natijada Toshkent shahar ma’muriy sudi MIBning qarorini bekor qilgan, prokuratura protesti esa yuqori instansiya tomonidan rad etilgan.
MIBning ta’kidlashicha, aynan amaldagi sud qarorlari yangi agentlikdan qarzdorlikni undirish va sobiq xodimlarni ishga tiklash bo‘yicha ijro harakatlarini amalga oshirishga huquqiy to‘siq bo‘lib turibdi.
Shu sababli Byuro 2026-yil 4-iyun kuni Fuqarolik ishlari bo‘yicha Shayxontohur tumanlararo sudiga murojaat qilib, sud qarorini ijro etish tartibiga aniqlik kiritishni so‘ragan.
MIBga ko‘ra, sudning tegishli tushuntirishi olingach, ijro harakatlari qonunchilikda belgilangan tartibda davom ettiriladi.
