Namanganda do‘lga qarshi 18 ta "Alazan-6" raketalari uchirildi
Maxsus choralar qishloq xo‘jaligi ekinlarini do‘lning salbiy ta’siridan himoya qilish maqsadida amalga oshirildi.
Namangan viloyatining Yangiqo‘rg‘on tumanida qishloq xo‘jaligi ekinlarini do‘lning salbiy ta’siridan himoya qilish maqsadida 18 ta "Alazan-6" do‘lga qarshi raketa qo‘llanildi. Bu haqda "O‘zgidromet" xabar berdi.
Ma’lum qilinishicha, 23-iyul kuni Qirg‘iziston hududidan Yangiqo‘rg‘on tumani tomon konvektiv do‘l bulutlari siljigan. Natijada hududda kuchli do‘l yog‘ishi kuzatilgan.
Shundan so‘ng Yangiqo‘rg‘on gidrometeorologiya majmuasi mutaxassislari do‘lning davom etishining oldini olish hamda qishloq xo‘jaligi ekinlarini himoya qilish maqsadida do‘l bulutlariga faol ta’sir ko‘rsatish ishlarini amalga oshirdi.
Jumladan, 18 ta "Alazan-6" do‘lga qarshi raketa uchirildi. Ularning:
-
6 tasi 1-sonli texnologik qo‘mondonlik punktidan Iskovot, Yangihayot va Xadikent yo‘nalishlarida;
-
6 tasi 3-sonli punktdan Bog‘iston va O‘rtayalong‘och yo‘nalishlarida;
-
yana 6 tasi 4-sonli punktdan Bog‘iston, O‘rtayalong‘och va Xadikent yo‘nalishlarida qo‘llanilgan.
Mazkur tadbirlar do‘lning qishloq xo‘jaligi ekinlariga yetkazishi mumkin bo‘lgan zararni kamaytirish maqsadida amalga oshirilgani qayd etildi.
