O‘ta xavfli jinoyatchi Misrdan O‘zbekistonga ekstraditsiya qilindi
Interpol qidiruvidagi shaxs tovlamachilik va boshqa og‘ir jinoyatlarda ayblangan.
Uzoq vaqt davomida odil sudlovdan yashirinib yurgan o‘ta xavfli jinoyatchi Misr Arab Respublikasidan O‘zbekistonga ekstraditsiya qilindi. Bu haqda Interpolning O‘zbekistondagi Milliy markaziy byurosi ma’lum qildi.
Qayd etilishicha, mazkur shaxs tovlamachilik va boshqa og‘ir jinoyatlarni sodir etganlikda ayblanib, O‘zbekiston huquqni muhofaza qiluvchi organlari tashabbusi bilan xalqaro qidiruvga berilgan.
Interpolning O‘zbekistondagi va Qohira shahridagi Milliy markaziy byurolari hamkorligida qidiruvdagi shaxsning harakatlanish yo‘nalishlari aniqlanib, uning Misr hududida ekani tasdiqlangan.
Ekstraditsiya to‘g‘risidagi so‘rov ko‘rib chiqilgach, Misrning vakolatli idoralari uni O‘zbekistonga topshirish haqida qaror qabul qilgan.
Barcha xalqaro-huquqiy tartib-taomillar yakunlangach, qidiruvdagi shaxs Interpol xodimlariga topshirilib, O‘zbekiston qonunchiligiga muvofiq jinoiy javobgarlikka tortish uchun mamlakatga olib kelindi.
