O‘zbekistonlik olima Xalqaro Matematika Ittifoqi qo‘mitasi a’zoligiga saylandi
AQShda o‘tgan Xalqaro Matematika Ittifoqi Bosh Assambleyasida olima Umida Baltayeva nufuzli qo‘mita tarkibiga saylandi.
AQShning Nyu-York shahrida Xalqaro Matematika Ittifoqi (International Mathematical Union – IMU) Bosh Assambleyasining navbatdagi yig‘ilishi bo‘lib o‘tdi. Unda dunyoning yetakchi matematik olimlari, milliy matematika jamiyatlari rahbarlari hamda IMU rahbariyati ishtirok etdi.
Mazkur nufuzli anjumanda O‘zbekiston delegatsiyasi ham faol qatnashdi.
Yig‘ilish yakunlariga ko‘ra, Xorazm Ma’mun akademiyasi bosh ilmiy xodimi, professor Umida Baltayeva IMUning Rivojlanayotgan davlatlar qo‘mitasi (Committee for Developing Countries) a’zoligiga saylandi. Ushbu saylov O‘zbekiston matematika ilm-fani va mamlakat matematiklari uchun muhim xalqaro e’tirof sifatida baholanmoqda.
Shuningdek, O‘zbekiston Fanlar akademiyasi Matematika instituti laboratoriya mudiri, professor Ravshan Ashurov ham Bosh Assambleya muhokamalarida faol ishtirok etdi. U xorijlik hamkasblari bilan ilmiy hamkorlikni kengaytirish, qo‘shma loyihalarni yo‘lga qo‘yish hamda institutsional aloqalarni mustahkamlash yuzasidan qator uchrashuvlar o‘tkazdi.
Ta’kidlanishicha, mazkur yig‘ilish O‘zbekiston matematiklarining xalqaro ilmiy hamjamiyatdagi faolligi va nufuzini oshirish, yangi ilmiy hamkorliklarni rivojlantirish hamda mamlakat matematika maktabining xalqaro maydondagi o‘rnini yanada mustahkamlashda muhim ahamiyat kasb etadi.
