Toshkentda “zakladka” orqali narkotik tarqatgan ukrainaliklar ushlandi
Uch nafar xorij fuqarosi uyida 2,4 kilogrammdan ortiq giyohvandlik vositalari musodara qilindi.
“Xavfsiz va sog‘lom yurt” tezkor-profilaktik tadbirlari doirasida Davlat xavfsizlik xizmati Toshkent shahar boshqarmasi hamda poytaxt Ichki ishlar bosh boshqarmasi xodimlari hamkorligida o‘tkazilgan tezkor tadbirda giyohvandlik vositalari savdosi bilan shug‘ullangan xorij fuqarolari ushlandi. Bu haqda DXX xabar berdi.
Aniqlanishicha, joriy yil 12-iyun kuni O‘zbekistonga kelgan Ukrainaning 1994, 1997 va 2001-yillarda tug‘ilgan uch nafar fuqarosi Toshkent shahrining Yashnobod tumanida vaqtincha yashab turgan ikki xonadonda istiqomat qilgan.
Tezkor tadbir davomida ularning yashash joylari ko‘zdan kechirilganda, poytaxtning turli hududlariga “zakladka” usulida tarqatish uchun tayyorlangan narkotik moddalar borligi aniqlangan.
Musodara qilingan moddalar “gashish”, “mefedron” va “alfa-PVP” bo‘lib, ularning umumiy og‘irligi 1 kilogramm 945 grammni tashkil etgan.
Bundan tashqari, internet orqali faoliyat yurituvchi narkodo‘kon tashkilotchilari tomonidan ushbu shaxslarga keyinchalik qayta qadoqlab tarqatish uchun xufiya joyda qoldirilgan 460 gramm “mefedron” va “alfa-PVP” ham ashyoviy dalil sifatida olingan.
Mazkur holat yuzasidan Jinoyat kodeksining 273-moddasi 6-qismi “a” bandi bilan jinoyat ishi qo‘zg‘atilgan. Gumonlanuvchilarga nisbatan qamoq ehtiyot chorasi qo‘llanilgan bo‘lib, tergov harakatlari davom ettirilmoqda.
