Angrenda mashinadan unashtirilgan yigit va qizning jasadi topildi
Sud-tibbiy ekspertizasiga ko‘ra, ularning o‘limiga is gazidan zaharlanish sabab bo‘lgan.
Toshkent viloyati Angren shahrida unashtirilgan yigit va qiz avtomobil ichida is gazidan zaharlanib vafot etdi. Bu haqda Millar xabar berdi.
Ma’lum qilinishicha, 16-iyul kuni soat 23:53 da Angren shahrida yashovchi fuqaro Toshkent viloyati IIBB navbatchilik qismiga murojaat qilib, 26 yoshli singlisi va uning 31 yoshli bo‘lajak turmush o‘rtog‘i Gentra avtomobilida uydan chiqib ketgani va qaytib kelmaganini ma’lum qilgan.
Olib borilgan tezkor-qidiruv tadbirlari davomida yigit va qizning jasadi garaj ichida turgan Gentra avtomobilidan is gazidan zaharlanish alomatlari bilan topilgan.
Sud-tibbiy ekspertizasining dastlabki xulosasiga ko‘ra, ularning o‘limiga is gazidan zaharlanish oqibatida yuzaga kelgan bosh miya va o‘pka shishi hamda o‘tkir yurak-qon tomir yetishmovchiligi sabab bo‘lgan.
Mahalla faollarining aytishicha, marhumlar yaqin kunlarda nikoh to‘yi o‘tkazishni rejalashtirgan bo‘lib, oilalar o‘rtasida nizolar kuzatilmagan.
Hozirda mazkur holat yuzasidan Angren shahar prokuraturasi tomonidan tergovga qadar tekshiruv ishlari olib borilmoqda.
