Elektr energetikasi tizimida dispetcherlik boshqaruvi takomillashtiriladi

 

Vazirlar Mahkamasining 2026-yil 21-iyuldagi 400-son qarori bilan Energetika vazirligi huzuridagi “Milliy dispetcherlik markazi” davlat muassasasi faoliyatini takomillashtirish bo‘yicha qo‘shimcha chora-tadbirlar belgilandi.

 

Qarorga muvofiq, elektr energetikasi tizimida tezkor-dispetcherlik boshqaruvini yanada takomillashtirish, qayta tiklanuvchi energiya manbalarini yagona energetika tizimiga samarali integratsiya qilish hamda Milliy dispetcherlik markazi faoliyatini kuchaytirish nazarda tutilgan.

 

Shuningdek, “O‘zbekiston milliy elektr tarmoqlari” AJ va “Hududiy elektr tarmoqlari” AJ tomonidan bajarib kelinayotgan milliy, mintaqaviy va hududiy dispetcherlik funksiyalari Milliy dispetcherlik markazi boshqaruviga o‘tkaziladi.

 

Mazkur o‘zgarish elektr energetikasi tizimini yagona markazdan tezkor muvofiqlashtirish, elektr tarmoqlari faoliyati samaradorligini oshirish hamda iste’molchilarni elektr energiyasi bilan yanada ishonchli ta’minlashga xizmat qilishi ta’kidlandi.

 

Qaror bilan, shuningdek, energiya balansini real vaqt rejimida rejalashtirish va prognozlashning zamonaviy raqamli tizimlarini joriy etish belgilangan. Xususan, PowerFactory (DIgSILENT) va PLEXOS dasturiy platformalari yordamida elektr energiyasi ishlab chiqarish, jumladan, quyosh va shamol elektr stansiyalari quvvatlari hamda ularning elektr tarmog‘iga ta’siri yanada aniq prognoz qilinadi.

 

Bundan tashqari, dispetcherlik boshqaruvini raqamlashtirish, ilg‘or xalqaro tajribani joriy etish va soha mutaxassislarining malakasini oshirish bo‘yicha ham qator vazifalar belgilangan.