Isroil sulhga qaramay Livan janubida harbiy amaliyotlarni davom ettirmoqda
Livan hukumati buni sulhning navbatdagi buzilishi deb baholab. Isroilni mamlakat suverenitetiga tajovuz qilishda ayblagan.
Isroil armiyasi Livan janubidagi bir qator hududlarda binolarni portlatish va harbiy amaliyotlarni davom ettirdi. Bu harakatlar Isroil va Livan o‘rtasida AQSH vositachiligida erishilgan sulh amalda bo‘lib turgan hamda tomonlar vaziyatni barqarorlashtirish bo‘yicha muzokaralarni davom ettirayotgan bir paytda sodir bo‘lmoqda.
Al Jazeera xabariga ko‘ra, Isroil harbiylari Kfar Kila, Mays al-Jabal, Xula va Markaba kabi chegara qishloqlarida bir nechta bino va inshootlarni portlatgan. Livan rasmiylari buni sulh kelishuvining navbatdagi buzilishi deb baholab, Isroilni mamlakat suverenitetiga tajovuz qilishda ayblagan.
So‘nggi kunlarda AQSH vositachiligida Isroil qo‘shinlarini Livan janubidan bosqichma-bosqich olib chiqish, ularning o‘rniga Livan armiyasini joylashtirish hamda chegaradagi xavfsizlikni mustahkamlash masalalari yuzasidan muzokaralar olib borilmoqda. Biroq Isroil armiyasi Hizbulloh harakatiga tegishli deb hisoblagan harbiy infratuzilmaga zarba berish operatsiyalari davom etishini bildirgan.
O‘z navbatida, Hizbulloh Isroilni sulh shartlarini muntazam ravishda buzayotganlikda ayblab, xalqaro hamjamiyatni bosimni kuchaytirishga chaqirdi. Livan hukumati ham Isroilning harbiy harakatlari mintaqadagi vaziyatni yanada keskinlashtirayotganini ta'kidlamoqda.
