Marko Rubio AQShga kirish bo‘yicha yangi cheklovlarni e’lon qildi
Ayrim jinoyatlarga aloqador shaxslar hamda ularning yaqinlariga viza berilmaydi.
AQSh Davlat kotibi Marko Rubio kiberjinoyatlar va boshqa transmilliy onlayn jinoyatlarga aloqador shaxslarga nisbatan yangi viza cheklovlari joriy etilishini e’lon qildi. Bu haqda AQSh Davlat departamenti ma’lum qildi.
Yangi siyosatga ko‘ra, kiberfiribgarlik, kiberjinoyatlar hamda bolalarga nisbatan onlayn jinsiy zo‘ravonlik kabi jinoyatlarni sodir etgan yoki ularga aloqador deb gumon qilinayotgan shaxslar, shuningdek, ayrim hollarda ularning yaqin qarindoshlari ham AQSh vizasini olish imkoniyatidan mahrum etilishi mumkin.
Marko Rubioning ta’kidlashicha, bu turdagi jinoyatlar ortida ko‘pincha transmilliy jinoiy guruhlar turadi.
"Ko‘pincha Xitoy transmilliy jinoiy tashkilotlari tomonidan muvofiqlashtiriladigan firibgarlik sxemalari faqat 2024-yilning o‘zida amerikaliklarga kamida 10 milliard dollar zarar yetkazdi. Bundan tashqari, amerikalik bolalar xorijdan boshqariladigan jinsiy zo‘ravonlik tarmoqlarining nishoniga aylanmoqda," — degan AQSh Davlat kotibi.
Rubioning so‘zlariga ko‘ra, yangi viza siyosati korrupsiya, pul yuvish, odam savdosi va boshqa transmilliy jinoyatlarga qarshi kurashni kuchaytirishga xizmat qiladi.
