Ostonada ilk havo taksisi sinovdan o‘tkazildi

 

Qozog‘iston poytaxti Ostonada elektr vertikal uchish va qo‘nish (eVTOL) texnologiyasiga asoslangan ilk havo taksisining namoyish parvozi muvaffaqiyatli o‘tkazildi.

 

Namoyish parvozi "Kelajak o‘yinlari – 2026" (GOTF 2026) xalqaro turniri doirasida tashkil etildi. Loyiha Qozog‘istonning Alatau Advance Air Group Ltd. (AAAG) kompaniyasi hamda Xitoyning AutoFlight kompaniyasi hamkorligida amalga oshirilgan.

 

Sinovda AutoFlight Prosperity rusumidagi eVTOL havo taksisidan foydalanilgan. Qurilma bir nafar uchuvchi va besh nafar yo‘lovchini tashishga mo‘ljallangan bo‘lib, soatiga 200 kilometrgacha tezlikda harakatlana oladi va 200 kilometrgacha masofani bosib o‘tish imkoniyatiga ega. 13 ta elektr dvigatel bilan jihozlangan ushbu transport vositasi shovqini past va atmosferaga karbonat angidrid chiqarmaydi.

 

Xavfsizlik talablariga muvofiq, ilk namoyish parvozi yo‘lovchilarsiz amalga oshirilgan. Bu yangi avlod aviatsiya texnologiyalarini tijorat foydalanishidan avval sinovdan o‘tkazish bo‘yicha xalqaro amaliyot hisoblanadi.

 

Qozog‘iston rasmiylari ushbu loyiha mamlakatda Urban Air Mobility (UAM) — shahar havo transporti tizimini shakllantirish bo‘yicha keng ko‘lamli dasturning bir qismi ekanini ta’kidlagan. Mazkur yo‘nalishda zarur qonunchilik bazasi yaratilib, vertiportlar, uchuvchisiz havo harakatini boshqarish tizimlari va raqamli infratuzilmani rivojlantirish ishlari boshlangan.

 

Shuningdek, 2028-yilgacha Qozog‘istonda oltita vertiport qurish va havo taksilarini mamlakat transport tizimiga bosqichma-bosqich integratsiya qilish rejalashtirilgan. Mutasaddilar fikricha, ushbu texnologiya yo‘lovchi tashish bilan birga logistika, shoshilinch tibbiy yordam va boshqa xizmatlar rivojiga ham xizmat qiladi.