O‘zbekiston biometrik pasportlari xalqaro xavfsizligi kuchaytirildi
Mazkur yangilanish biometrik pasportlardagi ma’lumotlar yaxlitligini ta’minlab, xalqaro sayohatlar xavfsizligini oshirishga xizmat qiladi.
Joriy yilning 21-iyul kuni Ichki ishlar vazirligi Migratsiya va shaxsiylashtirish departamenti Shaxsiylashtirish markazi delegatsiyasi Kanadaning Monreal shahrida joylashgan Xalqaro fuqaro aviatsiyasi tashkiloti (ICAO) bosh qarorgohiga tashrif buyurdi.
Tashrif davomida O‘zbekiston fuqarolarining biometrik pasportlari xavfsizligini ta’minlovchi PKI (Ochiq kalit infratuzilmasi) hamda ICAO PKD (ICAO Ochiq kalit reyestri) raqamli sertifikatlari ICAO Doc 9303 xalqaro standarti talablariga muvofiq muvaffaqiyatli yangilandi.
Yangilangan sertifikatlar ICAO PKD tizimiga a’zo barcha davlatlarga tarqatildi. Bu esa xorijiy davlatlar chegara nazorati organlari tomonidan O‘zbekiston fuqarolarining biometrik pasportlarini tekshirish jarayonida yuzaga kelishi mumkin bo‘lgan texnik qiyinchiliklarning oldini oladi.
Shuningdek, mazkur yangilanish biometrik pasportlardagi ma’lumotlar yaxlitligini ishonchli himoya qilish, hujjatlarning haqiqiyligini tezkor tasdiqlash hamda xalqaro sayohatlar xavfsizligini yanada oshirishga xizmat qiladi.
Qayd etilishicha, O‘zbekiston ICAO PKD tizimining faol ishtirokchisi sifatida elektron sayohat hujjatlari infratuzilmasini rivojlantirish va ushbu yo‘nalishdagi xalqaro hamkorlikni izchil mustahkamlashni davom ettirmoqda.
