O‘zbekistonda hafta oxirida yana jazirama kuzatiladi
Ayrim hududlarda havo harorati 42 darajagacha ko‘tariladi.
"O‘zgidromet" ma’lumotiga ko‘ra, dam olish kunlari O‘zbekiston hududida asosan kam bulutli va yog‘ingarchiliksiz ob-havo kuzatiladi. Faqat ayrim tog‘li hududlarda qisqa muddatli yomg‘ir yog‘ishi va momaqaldiroq bo‘lishi mumkin.
Sinoptiklar prognoziga ko‘ra, havo harorati bosqichma-bosqich ko‘tarilib, yakshanba kuni 36–39 darajagacha, respublikaning shimoliy, janubiy va cho‘l hududlarida esa 40–42 darajagacha issiq bo‘lishi kutilmoqda.
Shuningdek, shimoliy va cho‘l hududlarida shamol tezligi 13–18 m/s gacha kuchayishi, ayrim joylarda chang-to‘zonlar kuzatilishi mumkin.
Bundan tashqari, 24-iyul kuni Toshkent, Andijon, Namangan va Farg‘ona viloyatlarining tog‘oldi hamda tog‘li hududlarida sel-suv toshqinlari yuzaga kelishi ehtimoli saqlanib qolmoqda.
Toshkent shahrida esa dam olish kunlari kam bulutli va yog‘ingarchiliksiz ob-havo kuzatiladi. Shanba kuni havo harorati 35–37 daraja, yakshanba kuni esa 36–38 darajagacha ko‘tarilishi prognoz qilinmoqda. Shamol sharqdan 3–8 m/s tezlikda esadi.
