O‘zbekistondagi muzeylardan 500 dan ortiq eksponat yoqoldi
Qo‘qon davlat muzey-qo‘riqxonasi va Sirdaryo viloyati muzeyi fondlarida eksponatlar yetishmayotgani aniqlandi.
Respublikadagi davlat muzeylarida o‘tkazilayotgan inventarizatsiya jarayonida ayrim muzey fondlarida eksponatlar yetishmayotgani aniqlandi.
Madaniy meros agentligining ma’lum qilishicha, inventarizatsiya komissiyasi Qo‘qon davlat muzey-qo‘riqxonasi va uning filiallari, jumladan, G‘afur G‘ulom nomidagi Qo‘qon adabiy muzeyi fondlarida 500 ga yaqin muzey buyumi, shuningdek, Sirdaryo viloyati davlat tarix va madaniyat muzeyi kolleksiyasida 16 ta muzey eksponati yetishmayotganini aniqlagan.
Aniqlangan holatlar yuzasidan huquqiy baho berish va tegishli choralarni ko‘rish maqsadida materiallar belgilangan tartibda prokuratura organlariga yuborilgan.
Qayd etilishicha, inventarizatsiya O‘zbekiston Prezidentining “Muzeylarda xizmat ko‘rsatish sohasini rivojlantirish chora-tadbirlari to‘g‘risida”gi PQ-261-son qarori hamda Vazirlar Mahkamasi va Bosh prokuraturaning qo‘shma yig‘ilishi bayonnomasi ijrosi doirasida amalga oshirilmoqda.
Mazkur jarayon respublika muzeylari fondlarida saqlanayotgan muzey buyumlari va kolleksiyalarining saqlanish holatini bosqichma-bosqich o‘rganishga qaratilgan.
