Toshkentda Obodonlashtirish boshqarmasi boshlig‘i jarimaga tortildi
Bunga anomal issiq sharoitida tozalash xizmati xodimlari ishga jalb etilgani hamda ularga zarur mehnat sharoitlari yaratilmagani sabab bo‘ldi.
Toshkent shahrining Yakkasaroy tumanida anomal issiq sharoitida tozalash xizmati xodimlarini ishga jalb qilish holati yuzasidan Obodonlashtirish boshqarmasi boshlig‘i ma’muriy javobgarlikka tortildi.
Davlat mehnat inspeksiyasi ma’lum qilishicha, ijtimoiy tarmoqlarda 18-iyul kuni Shota Rustaveli ko‘chasida yuqori havo haroratiga qaramay obodonlashtirish xodimlari ishlayotgani aks etgan videolar tarqalganidan so‘ng holat o‘rganilgan.
Tekshiruv davomida Yakkasaroy tumani Obodonlashtirish boshqarmasida mehnatni muhofaza qilish talablari buzilgani, jumladan, obodonlashtirish ishlariga jalb etilgan xodimlar uchun qonunchilikda belgilangan qulay va xavfsiz mehnat sharoitlari yaratilmagani aniqlangan.
Aniqlangan qonunbuzarliklar yuzasidan Obodonlashtirish boshqarmasi boshlig‘iga nisbatan Ma’muriy javobgarlik to‘g‘risidagi kodeksning 49-moddasi 1-qismi (mehnat va mehnatni muhofaza qilish to‘g‘risidagi qonunchilikni buzish) asosida ma’muriy javobgarlik chorasi qo‘llanildi.
