Toshkentda Shahrisabz ko‘chasida BRT yo‘lagi qurilishi boshlanadi
Qurilish ishlari yo‘lning markaziy qismida amalga oshiriladi, transport harakati esa chekka polosalar orqali davom ettiriladi.
Toshkent shahrining Mirobod tumanidagi Shahrisabz ko‘chasida BRT (Bus Rapid Transit) yo‘lagini tashkil etish bo‘yicha qurilish-ta’mirlash ishlari boshlanadi. Bu haqda Yo‘l harakatini boshqarish markazi ma’lum qildi.
Ma’lum qilinishicha, poytaxt aholisi tomonidan ijobiy baholangan Shota Rustaveli ko‘chasidagi BRT yo‘lagi endilikda Shahrisabz ko‘chasi bo‘ylab davom ettiriladi.
Shu munosabat bilan 2026-yil 24-iyul soat 01:00 dan 9-avgust soat 23:00 gacha Shahrisabz ko‘chasining Shahrisabz–Mirobod–Shota Rustaveli aylanma chorrahasidan Amir Temur shoh ko‘chasi bilan kesishmasigacha bo‘lgan qismida yo‘lni BRT talablari asosida moslashtirish ishlari olib boriladi.
Qayd etilishicha, ushbu davr mobaynida mazkur yo‘l qismi transport harakati uchun to‘liq yopilmaydi. Qurilish-ta’mirlash ishlari yo‘lning markazidagi to‘rtta harakatlanish polosasida amalga oshiriladi.
Shu bilan birga, har ikki yo‘nalishda transport vositalari yo‘lning o‘ng chekkasidagi ikkita harakatlanish polosasi orqali harakatlanishda davom etadi. Haydovchilarga mazkur hududdan harakatlanishda ehtiyotkor bo‘lish va vaqtinchalik yo‘l harakati tashkil etilishiga amal qilish tavsiya etildi.
