Urganchda shokolad ichidan “gashish” aniqlandi
Yangiqo‘rg‘onda esa 423 tup kannabis yetishtirilayotgani fosh etildi.
“Xavfsiz va sog‘lom yurt” keng qamrovli tezkor-profilaktik tadbirlari doirasida Xorazm va Namangan viloyatlarida giyohvandlik vositalari bilan bog‘liq ikki holat fosh etildi. Bu haqda Davlat xavfsizlik xizmati xabar berdi.
Ma’lum qilinishicha, DXX, Ichki ishlar va Bojxona organlari xodimlari hamkorligida Xorazm viloyati Urganch tumanida o‘tkazilgan tezkor tadbirda 2000-yilda tug‘ilgan, muqaddam sudlangan fuqaro Rossiya Federatsiyasidan taksi orqali yuborilgan jo‘natmani qabul qilib olayotgan vaqtda ushlangan.
Tekshiruv davomida jo‘natma ichidagi 10 dona shokolad qadoqlariga yashirilgan jami 967 gramm “gashish” moddasi aniqlanib, ashyoviy dalil sifatida rasmiylashtirilgan.
Shuningdek, DXXning Namangan viloyati bo‘yicha boshqarmasi hamda Ichki ishlar organlari hamkorligida o‘tkazilgan tezkor tadbirda Yangiqo‘rg‘on tumanida yashovchi 1988-yilda tug‘ilgan fuqaro o‘ziga tegishli yer maydonida 423 tup kannabis o‘simligini kelgusida sotish maqsadida parvarishlab kelayotgani aniqlangan.
Hozirda har ikkala holat yuzasidan jinoyat ishlari qo‘zg‘atilib, tergov harakatlari olib borilmoqda.
